Hparat Panglai Laika Naura gaw tengsha nga yang tinggyeng laikadum langai re. Aten shaning ram ram na hkra tinang ra sharawng ai, tinang hti ra ai, sunglang ra ai laikabuk ni hpe mari shinggyin da ai shaloi, laikabuk ni hpe tinang hkrai kyem mazing shalai kau ai hku n re sha, shawa masha ni mung mai hti lu na matu yawshada let, 2012 March 23 ya shani, Munglai Mazup makau, Laiza Mare, Lawk (5) kaw hpaw hpang wa ai. Shawa a matu hpaw da ai nga tim, ndai aten hta, laikabuk hkangzing na mayak mahkak nga ai a majaw, nta de shap wa ai lam hpe gaw n mai shi ai. Tinang ra ai laikabuk ni hpe sa tam hti na shara sha, naw rai nga ai. Laikabuk hpe bat lapran nhtoi ni hta jahpawt 8:00 AM – 5:00 PM laman sa mai hti ai.

Laikabuk jahpan ginchyum ai hpe Dewey Decimal hkrang hte galaw da ai rai nna, laikabuk tam ai lam hta yakhkak ai lam nga yang, lit it magam gun ni hpe san la mai ai. Laikabuk hpan ni gaw labau, htunghking hte mungmasa ni madung law ai raitim, kaga sut masa, hpungtang hpaji, shingni ginhpan ni hpe mung tawn da ai. Hparat Panglai Laika Naura gaw laikadum lik it sha n re ai sha, Wunpawng laili laika rawtjat na matu galaw mai ai lamang ni hpe mung, matut manoi galaw na matu yawshada da ai.

Laili laika rawtjat lam npawt nhpang hku nna laika ka ladat sharin jahpat ai lamang, laika dip shabra ai lamang hte kaga lamang ni hpe mung, matut galaw sa wa na re. 2013 ning April shata hta, Jinghpaw Laika ka ladat wunkat hpe Laiza kaw galaw lai wa sai. Matut na mung, ladat shaw nna wunkat ni naw galaw sa wa na re.

2015 ning Mungkan Nanghpam Lusha Ninghkap Nhtoi masat laika ngau shingjawng lamang hpe mung, galaw lu sai. Matut nna laikabuk dik shapraw ai lam ni hpe mung galaw nga dingngam rai nna, ndai Hparat Panglai Journal hpe mung, shata lahkawng e kalang, matut manoi dip shabra sa matwa na hpe yawshada nga ga ai.

Laika hti shawa ni hku nna laili laika hte seng ai lam, laili laika sha-it hpe hpaji jawq mayu ai lam ni nga yang, galoi mung matut mahkai wa na hpe myit mada nga ga ai.